Tafseer-e-Mazhari

قِیْلَ لَهَا ادْخُلِی الصَّرْحَ١ۚ فَلَمَّا رَاَتْهُ حَسِبَتْهُ لُجَّةً وَّ كَشَفَتْ عَنْ سَاقَیْهَا١ؕ قَالَ اِنَّهٗ صَرْحٌ مُّمَرَّدٌ مِّنْ قَوَارِیْرَ١ؕ۬ قَالَتْ رَبِّ اِنِّیْ ظَلَمْتُ نَفْسِیْ وَ اَسْلَمْتُ مَعَ سُلَیْمٰنَ لِلّٰهِ رَبِّ الْعٰلَمِیْنَ۠ ۧ

قِيْلَ : کہا گیا لَهَا : اس سے ادْخُلِي : تو داخل ہو الصَّرْحَ : محل فَلَمَّا : پس جب رَاَتْهُ : اس نے اس کو دیکھا حَسِبَتْهُ : اسے سمجھا لُجَّةً : گہرا پانی وَّكَشَفَتْ : اور کھول دیں عَنْ : سے سَاقَيْهَا : اپنی پنڈلیاں قَالَ : اس نے کہا اِنَّهٗ : بیشک یہ صَرْحٌ : محل مُّمَرَّدٌ : جڑا ہوا مِّنْ : سے قَوَارِيْرَ : شیشے (جمع) قَالَتْ : وہ بولی رَبِّ : اے میرے رب اِنِّىْ ظَلَمْتُ : بیشک میں نے ظلم کیا نَفْسِيْ : اپنی جان وَاَسْلَمْتُ : اور میں ایمان لائی مَعَ : ساتھ سُلَيْمٰنَ : سلیمان لِلّٰهِ : اللہ کے لیے رَبِّ الْعٰلَمِيْنَ : تمام جہانوں کا رب

(پھر) اس سے کہا گیا کہ محل میں چلیے، جب اس نے اس (کے فرش) کو دیکھا تو اسے پانی کا حوض سمجھا اور (کپڑا اٹھا کر) اپنی پنڈلیاں کھول دیں۔ سلیمان نے کہا یہ ایسا محل ہے جس میں (نیچے بھی) شیشے جڑے ہوئے ہیں۔ وہ بول اٹھی کہ پروردگار میں اپنے آپ پر ظلم کرتی رہی تھی اور (اب) میں سلیمان کے ہاتھ پر خدائے رب العالمین پر ایمان لاتی ہوں

قیل لھا ادخلی الصرح . اس سے کہا گیا : صحن میں داخل ہوجاؤ۔ فلما راتہ حسبتہ لجۃ . (وہ دروازہ کے اندر آگئی اور آ کر) جب صحن کو دیکھا تو اس کو پانی کا کنڈ (یا تالاب یا حوض) سمجھی۔ وکشفت عن ساتیھا . اور اپنی پنڈلیوں سے کپڑا ہٹایا تاکہ میں داخل ہوجاؤں۔ ابن ابی شیبہ ‘ ابن المنذر ‘ عبد بن حمید اور ابن ابی حاتم نے حضرت ابن عباس ؓ کے نقل کردہ ایک طویل بیان میں کہا ہے کہ بلقیس کے آنے سے پہلے حضرت سلیمان ( علیہ السلام) نے ایک قصر بنوایا جس کا صحن سفید آبگینہ کا رکھا اور اس کے نیچے پانی چھوڑ دیا ‘ پانی کے نیچے آبی جانور بھی چھوڑ دئیے اور اپنے تخت کو اس صحن کے شہ نشین پر بچھوایا اور تخت پر تشریف فرما ہوگئے۔ جب بلقیس آئی اور اس نے صحن کو دیکھا تو رکا ہوا پانی خیال کیا اور پنڈلیوں سے کپڑا اٹھا دیا تاکہ پانی میں گھس کر سلیمان ( علیہ السلام) کے پاس پہنچ جائے۔ سلیمان ( علیہ السلام) نے اس کی طرف دیکھا تو پنڈلیاں اور قدم بہت ہی خوبصورت دکھائی دئیے ‘ البتہ پنڈلیوں پر بال تھے۔ سلیمان ( علیہ السلام) نے دیکھ کر نظر پھیرلی۔ علماء نے اسی جگہ سے یہ مطلب اخذ کیا ہے کہ اگر اجنبی عورت کو نکاح کا پیام دینا ہو تو اس کو دیکھ لینا جائز ہے۔ رسول اللہ ﷺ نے ارشاد فرمایا تھا : تم میں سے جب کوئی کسی عورت کو نکاح کا پیام دے اور وہ حصۂ بدن (چہرہ وغیرہ) دیکھنا ممکن ہو جس کو دیکھ کر نکاح کرسکے تو ایسا کرلے۔ رواہ ابو داؤد عن جابر وروی احمد والترمذی والنسائی و ابن ماجہ و الدارمی عن مغیرہ بن شعبتہ ؓ ۔ حضرت مغیرہ ؓ کا بیان ہے : میں نے ایک عورت کو نکاح کا پیام بجھوایا۔ رسول اللہ ﷺ نے مجھ سے فرمایا : کیا تم نے اس کو دیکھ لیا ہے ؟ میں نے کہا : نہیں۔ فرمایا : تو اس کو دیکھ لو۔ تم دونوں کے آپس میں محبت پیدا کرنے کے لئے یہ بات مناسب ہے۔ قال انہ صرح ممردمن قواریر . کہنے والے نے کہا : یہ آبگینہ کا بنا ہوا چکنا صحن ہے (پانی نہیں ہے) ۔ مُمَرَّدٌ چکنا۔ امرد بھی اسی سے بنا ہے (وہ لڑکا جس کی داڑھی ابھی نہ نکلی ہو) ۔ قالت رب انی ظلمت نفسی واسلمت مع سلیمن للّٰہ رب العلمین . کہنے لگی : اے میرے رب ! میں نے اپنی جان پر ظلم کیا اور (اب میں نے سورج کی پوجا وغیرہ سے توبہ کی اور) سلیمان ( علیہ السلام) کے ساتھ اللہ رب العالمین کی توحید خلوص کے ساتھ ایمان لائی (یا خالص طور پر اللہ رب العالمین کی فرمانبردار ہوگئی) ۔ آیت کی تفسیر میں یہ بھی کہا گیا ہے کہ جب بلقیس صحن پر پہنچی اور اس کو کنڈ سمجھی تو خیال کیا کہ سلیمان ( علیہ السلام) مجھے غرق کرنا چاہتے ہیں ‘ اس سے تو قتل ہونا آسان ہے۔ پھر جب حقیقت ظاہر ہوگئی تو کہنے لگی : میں نے سلیمان پر بدگمان کر کے اپنے اوپر ظلم کیا ‘ اب میں نے توبہ کی اور اسلام لے آئی۔ مسلمان ہونے کے بعد بلقیس کے احوال کو عطماء نے مختلف طور پر بیان کیا ہے۔ عون بن عبد اللہ نے بیان کیا : ایک شخص نے عبداللہ بن عیینہ سے دریافت کیا : کیا حضرت سلیمان ( علیہ السلام) نے بلقیس سے نکاح کرلیا تھا ؟ ابن عیینہ نے کہا : بلقیس کا واقعہ تو اَسْلَمْتُ مَعَ سُلَیْمَانَ لِلّٰہِ رَبِّ الْعَالَمِیْنَ پر ختم ہوگیا۔ یعنی ہم کو اس سے زیادہ علم نہیں۔ بعض لوگوں کا خیال ہے کہ نکاح کرلیا تھا۔ ابن عساکر نے عکرمہ کا یہی قول نقل کیا ہے۔ عکرمہ کا بیان ہے کہ جب سلیمان نے بلقیس سے نکاح کرنا چاہا تو پنڈلیوں پر بالوں کی کثرت پسند نہ آئی۔ لوگوں سے بال صاف کرنے کی تدبیر دریافت کی تو لوگوں نے اس کی تدبیر استرہ بتائی۔ بلقیس نے کہا : میری جلد کو لوہا کبھی نہیں چھو سکتا۔ حضرت سلیمان ( علیہ السلام) نے بھی استرہ کو پسند نہیں کیا اور فرمایا : استرہ تو کاٹ دیتا ہے۔ پھر آپ نے جنات سے دریافت کیا ‘ انہوں نے بھی لاعلمی ظاہر کی۔ پھر آپ نے شیطانوں سے پوچھا تو انہوں نے کہا : ہم آپ کے لئے ایسی تدبیر کریں گے کہ جلد سفید چاندی کی طرح ہوجائے گی۔ چناچہ انہوں نے نورہ اور حمام کی ترکیب بتائی (نورہ بال صفا چونہ) اسی زمانہ میں حماموں کا اور چونہ کا رواج ہوگیا۔ حضرت سلیمان ( علیہ السلام) کے حکم سے جنات نے یمن میں تین قلعے اتنے اونچے بنائے کہ ایسے اونچے اور خوبصورت قلعے کسی نے نہ دیکھے ہوں گے ان کے نام تھے سلحون ‘ سنون اور عمدان۔ جب حضرت سلیمان ( علیہ السلام) نے بلقیس کو ان کے ملک میں واپس کردیا تو ہر مہینے ملاقات کے لئے ایک بار جایا کرتے تھے اور تین روز وہاں قیام پذیر رہتے تھے۔ صبح کو شام سے یمن کو چل دیتے تھے اور پھر صبح کو ہی یمن سے شام کو روانہ ہوجاتے تھے۔ بلقیس کے بطن سے حضرت سلیمان ( علیہ السلام) کا ایک لڑکا بھی ہوا۔ وہب کا بیان ہے : لوگوں کا خیال ہے کہ بلقیس جب مسلمان ہوگئی تو حضرت سلیمان ( علیہ السلام) نے فرمایا : اپنی قوم میں سے کسی کا انتخاب کرلو ‘ میں تمہارا نکاح اس سے کر دوں گا۔ بلقیس نے کہا : اے اللہ کے نبی ! مجھ جیسی عورت مردوں سے نکاح کرلے (ایسا نہیں ہوسکتا) آپ کو معلوم ہے کہ میری قوم میں بادشاہ بھی ہیں ‘ بڑے بڑے تسلط والے سردار بھی ہیں (لیکن میں نے کسی سے نکاح نہیں کیا) حضرت سلیمان ( علیہ السلام) نے فرمایا : ہاں مجھے معلوم ہے لیکن اسلام میں ایسا کرنا ہی ہوگا۔ یہ بات کسی طرح زیبا نہیں کہ اللہ نے جو چیز تمہارے لئے حلال کی ہے تم اس کو اپنے لئے حرام کرلو۔ بلقیس نے کہا : جب ایسا کرنا ضروری ہی ہے تو میرا نکاح ذی تبع شاہ ہمدان سے کرا دیجئے۔ حضرت سلیمان ( علیہ السلام) نے ذی تبع سے بلقیس کا نکاح کرا دیا ‘ پھر بلقیس کو یمن واپس کردیا اور یمن کا ملک ذی تبع کے تسلط میں دے دیا ‘ پھر یمن کے امیر جنات کو جس کا نام رویعہ تھا بلوا کر ہدایت فرما دی کہ ذی تبع تم سے جو کام لیں وہ کام تم انجام دیا کرو۔ حسب الحکم رویعہ عمل کرتا رہا اور ذی تبع حضرت سلیمان ( علیہ السلام) کی وفات تک یمن کا بادشاہ رہا۔ جب حضرت سلیمان ( علیہ السلام) کی وفات پر ایک سال گزر گیا اور جنات کو حضرت سلیمان ( علیہ السلام) کی وفات کا یقینی پتہ چل گیا تو ایک جن تہامہ میں آیا اور وسط یمن میں پہنچ کر چیخ کر اس نے کہا : اے گروہ جن ! شاہ سلیمان کی وفات ہوگئی ‘ اب تم (اپنی اپنی ڈیوٹیوں سے) ہاتھ اٹھا لو۔ سب دست بردار ہوگئے اور ادھر ادھر چلے گئے اور حضرت سلیمان ( علیہ السلام) کی حکومت کے ختم ہوتے ہی ذی تبع اور بلقیس کی حکومت کو بھی زوال ہوگیا۔ میں کہتا ہوں : حضرت سلیمان ( علیہ السلام) کا بلقیس کی پنڈلیوں کو دیکھنا اس روایت کی تائید ہے جس میں حضرت سلیمان ( علیہ السلام) کا بلقیس سے نکاح کرنا مذکور ہے اور ذی تبع سے نکاح کرانے کی روایت اس کے مقابلہ میں کمزور ہوجاتی ہے۔ کہا گیا کہ 13/ سال کی عمر میں حضرت سلیمان ( علیہ السلام) کو حکومت ملی تھی اور 53/سال کی عمر پا کر آپ کی وفات ہوئی۔ سبحان اللّٰہ من لازوال لمل کہ پاک ہے وہ خدا جس کی حکومت کو کبھی زوال نہیں۔ لا ملک سلیمان ولا بلقیس لا اٰدم فی الکون ولا ابلیس والکل فصورۃ وانت المعنی یامن ھو للقلوب مقناطیس نہ سلیمان کی حکومت (کوئی حقیقت رکھتی) ہے نہ بلقیس نہ آدم اس کائنات میں وجود (حقیقی) رکھتے ہیں نہ ابلیس۔ اے وہ ذات جو دلوں کو اپنی طرف کھینچنے والی مقناطیس ہے ! تو ہی حقیقت ہے اور کل جہان صورت۔

Top