Tafseer-e-Madani - Al-Kahf : 11
فَضَرَبْنَا عَلٰۤى اٰذَانِهِمْ فِی الْكَهْفِ سِنِیْنَ عَدَدًاۙ
فَضَرَبْنَا : پس ہم نے مارا (پردہ ڈالا) عَلٰٓي : پر اٰذَانِهِمْ : ان کے کان (جمع) فِي الْكَهْفِ : غار میں سِنِيْنَ عَدَدًا : کئی سال
سو ہم نے ان کے کانوں پر تھپکی دے کر ان کو اسی غار میں سلا دیا برسہا برس کے لئے،
14۔ اصحاب کہف کیلئے قدرت کی غیبی امداد کا ایک نمونہ ومنظر :۔ سو اس سے اس حقیقت کو واضح فرما دیا گیا کہ اصحاب کہف کی حفاظت کیلئے قدرت کی طرف سے خاص انتظام فرما دیا گیا چناچہ ارشاد فرمایا گیا کہ ہم نے ان کے کانوں پر تھپکی دے کر ان کو برسہابرس تک اسی غار میں سلا دیا، تاکہ زمانہ دراز کی ان کی اس نیند میں کوئی آواز وغیرہ خلل انداز نہ ہوسکے، اور وہ سکون اور آرام سے وہاں رہ سکیں، سو اس سے دنیا کو یہ عظیم درس دیا گیا کہ جو کوئی صدق دل سے اللہ تعالیٰ پر بھروسہ کرکے اس کی راہ میں نکلتا ہے۔ اور اس کی رضا کیلئے اور اس کے دین کی خاطر تکلیف اٹھاتا ہے، اللہ تعالیٰ اس کی نصرت و امداد کیلئے اسی طرح غیب سے اسباب پیدا کرتا اور وسائل مہیا فرماتا ہے، سبحانہ وتعالیٰ بشرطیکہ اس سے تعلق صحیح اور اس پر توکل و اعتماد پختہ اور مضبوط ہو، وباللہ التوفیق لما یحب ویرید وعلی مایحب ویرید۔
Top