Mazhar-ul-Quran

اِنَّ الَّذِیْنَ یُحِبُّوْنَ اَنْ تَشِیْعَ الْفَاحِشَةُ فِی الَّذِیْنَ اٰمَنُوْا لَهُمْ عَذَابٌ اَلِیْمٌ١ۙ فِی الدُّنْیَا وَ الْاٰخِرَةِ١ؕ وَ اللّٰهُ یَعْلَمُ وَ اَنْتُمْ لَا تَعْلَمُوْنَ

اِنَّ : بیشک الَّذِيْنَ : جو لوگ يُحِبُّوْنَ : پسند کرتے ہیں اَنْ : کہ تَشِيْعَ : پھیلے الْفَاحِشَةُ : بےحیائی فِي الَّذِيْنَ : میں جو اٰمَنُوْا : ایمان لائے (مومن) لَهُمْ : ان کے لیے عَذَابٌ : عذاب اَلِيْمٌ : دردناک فِي الدُّنْيَا : دنیا میں وَالْاٰخِرَةِ : اور آخرت میں وَاللّٰهُ : اور اللہ يَعْلَمُ : جانتا ہے وَاَنْتُمْ : اور تم لَا تَعْلَمُوْنَ : تم نہیں جانتے

بیشک1 جو لوگ (بعد نزول ان آیات کے بھی) یہ چاہتے ہیں کہ برا چرچہ مسلمانوں میں پھیلے تو ان کے لیے دنیا اور آخرت میں درد دینے والا عذاب (مقرر) ہے اور (دلوں کے راز اور باطن کے احوال) اللہ خوب جانتا ہے اور تم نہیں جانتے

جھوٹا عیب لگانے والوں پر دنیاوآخرت کا عذاب۔ (ف 1) اللہ تعالیٰ نے ان آیتوں میں فرمایا کہ جو لوگ بعد نزول ان آیات کے بھی یہ چاہتے ہیں کہ بدکاری کا چرچا مسلمانوں میں پھیلے یعنی ان کے دلوں میں بھی وسوسے پیدا ہوا کریں کہ فلاں نے آج یہ کام برا کیا، فلانے کی بیوی نے ایسا کیا، اور فلاں ایسا ہے تو ان پر دنیا میں بھی اللہ تعالیٰ کی طرف سے عذاب نازل ہوتا ہے اس لیے کہ شریعت کے موافق کوڑے مارے جاتے ہیں اور رد الشہادت اور لوگوں کی نگاہوں میں ذلیل غیرقابل الاعتبار ہوجاتے ہیں اور اس کے سوا آخرت میں بھی عذاب الٰہی میں مبتلا ہوتے ہیں اور خدا ہی خوب جانتا ہے جو برائیاں تم کرتے ہو اور تم اس کو نہیں جانتے۔ پھر فرمایا کہ یہ اللہ تعالیٰ کا فضل اور اس کی رحمت اور مہربانی ہے کہ اس نے ان جھوٹے بہتان لگانے والوں پر جلدی سے عذاب نہیں بھیجا، آگے مسلمانوں کو ہدایت فرمائی کہ شیطان لوگوں کو ایسی ہی بےحیائی کی باتیں سکھاتا ہے اس لیے ہر ایماندار آدمی کو چاہیے کہ شیطان کے کہنے پر نہ چلے۔ اور یہ اللہ تعالیٰ کا فضل اور رحمت ہے کہ جو ایماندار شخص شیطان کے حملے سے بچتا رہتا ہے اور شیطان کے حملہ کے وقت اللہ تعالیٰ سے پناہ چاہتا ہے تو اللہ تعالیٰ اس کو شیطان کے حملے سے بچا کر نیک راہ پر لگ جانے کی توفیق دیتا ہے پھر فرمایا اللہ تعالیٰ ہر ایک شخص کے منہ کی بات کو سنتا اور دل کے ارادہ کو جانتا ہے خالص دل سے جو کوئی شیطان کے حملے کو روکنے کی التجا کرے گا اللہ تعالیٰ ضرور اس کی مدد کرے گا۔

Top