Tafseer-e-Majidi

مَنِ اهْتَدٰى فَاِنَّمَا یَهْتَدِیْ لِنَفْسِهٖ١ۚ وَ مَنْ ضَلَّ فَاِنَّمَا یَضِلُّ عَلَیْهَا١ؕ وَ لَا تَزِرُ وَازِرَةٌ وِّزْرَ اُخْرٰى١ؕ وَ مَا كُنَّا مُعَذِّبِیْنَ حَتّٰى نَبْعَثَ رَسُوْلًا

مَنِ : جس اهْتَدٰى : ہدایت پائی فَاِنَّمَا : تو صرف يَهْتَدِيْ : اس نے ہدایت پائی لِنَفْسِهٖ : اپنے لیے وَمَنْ : اور جو ضَلَّ : گمراہ ہوا فَاِنَّمَا : تو صرف يَضِلُّ : گمراہ ہوا عَلَيْهَا : اپنے اوپر (اپنے بڑے کو) وَلَا تَزِرُ : اور بوجھ نہیں اٹھاتا وَازِرَةٌ : کوئی اٹھانے والا وِّزْرَ اُخْرٰى : دوسرے کا بوجھ وَ : اور مَا كُنَّا : ہم نہیں مُعَذِّبِيْنَ : عذاب دینے والے حَتّٰى : جب تک نَبْعَثَ : ہم (نہ) بھیجیں رَسُوْلًا : کوئی رسول

جو کوئی راہ پر چلتا ہے سو وہ اپنے ہی نفع کے لئے راہ پر چلتا ہے اور جو کوئی بےراہی کرتا ہے وہ بھی اپنے ہی لئے بےراہ ہوتا ہے اور کوئی کسی دوسرے کا بوجھ نہ اٹھائے گا،25۔ اور ہم کبھی سزا نہیں دیتے جب تک کسی رسول کو ہم بھیج نہیں لیتے،26۔

25۔ مشرک قوموں کا تو ذکر ہی نہیں، خود اہل کتاب و یہود ونصاری کے ہاں انفرادی ذمہ داری مٹ مٹا کر سارا زور مسئلہ ” شفاعت “ و ” کفارہ “ وغیرہ پر رہ گیا تھا۔ قرآن مجید میں اسی لئے ان عقاید کی پرزور تردید بار بار مختلف عنوانات سے ہوتی رہتی ہے اور یہاں بھی مقصود شخصی ذمہ داری ومسؤلیت کا اثبات ہے۔ 26۔ یہاں یہ عام قاعدہ بیان کردیا کہ تبلیغ دین، رسول یا اس کے کسی نائب کے ذریعہ سے ہوجانا ضروری ہے، بغیر اس کے کسی قوم پر عذاب نہیں آتا۔ اور محققین نے اس سے استنباط کرکے لکھا ہے کہ جن قوموں تک رسول کی اصلا خبر نہیں پہنچی وہ کفر ومعاصی پر معذب نہ ہوں گے۔ اور یہیں سے فقہاء نے یہ بھی نکالا ہے کہ کوئی کفار حربی اگر اسلام لے آئے اور اسے نماز زکوٰۃ وغیرہ کے احکام کی خبر نہ پہنچے تو جب تک اطلاع نہ پہنچ لے اس پر ان واجبات وفرائض کی قضا نہیں ہے۔ ھذا یدل علی من اسلم من اھل الحرب ولم یسمع بالصلاۃ ولزکوۃ ونحوھا من الشرائع السمعیۃ انہ لایلزمہ قضاء شیء منھا (جصاص) فیہ دلیل علی ان ماوجب وجب بالسمع لابالعقل (معالم) اور یہ نتیجہ بھی نکالا ہے کہ جب تک رسول ہی کے پیامات کی مخالفت نہ ہولے محض عقلی واجبات وفرائض کی مخالفت سے عذاب ہلاکت نازل نہیں ہوتا۔ انہ لایعذب عذاب الاستیصال الا بعد قیام حجۃ السمع بالرسول ان مخالفۃ موجبات احکام العقول قبل ورود السمع من جھۃ الرسول لاتوجب فی حکم اللہ عذاب الاستیصال (جصاص)

Top