Siraj-ul-Bayan

اَفَمَنْ زُیِّنَ لَهٗ سُوْٓءُ عَمَلِهٖ فَرَاٰهُ حَسَنًا١ؕ فَاِنَّ اللّٰهَ یُضِلُّ مَنْ یَّشَآءُ وَ یَهْدِیْ مَنْ یَّشَآءُ١ۖ٘ فَلَا تَذْهَبْ نَفْسُكَ عَلَیْهِمْ حَسَرٰتٍ١ؕ اِنَّ اللّٰهَ عَلِیْمٌۢ بِمَا یَصْنَعُوْنَ

اَفَمَنْ : سو کیا جس زُيِّنَ : آراستہ کیا گیا لَهٗ : اس کے لیے سُوْٓءُ عَمَلِهٖ : اس کا برا عمل فَرَاٰهُ : پھر اس نے دیکھا اسے حَسَنًا ۭ : اچھا فَاِنَّ اللّٰهَ : پس بیشک اللہ يُضِلُّ : گمراہ ٹھہراتا ہے مَنْ يَّشَآءُ : جس کو وہ چاہتا ہے وَيَهْدِيْ : اور ہدایت دیتا ہے مَنْ يَّشَآءُ ڮ : جس کو وہ چاہتا ہے فَلَا تَذْهَبْ : پس نہ جاتی رہے نَفْسُكَ : تمہاری جان عَلَيْهِمْ : ان پر حَسَرٰتٍ ۭ : حسرت کر کے اِنَّ اللّٰهَ : بیشک اللہ عَلِيْمٌۢ : جاننے والا بِمَا : اسے جو يَصْنَعُوْنَ : وہ کرتے ہیں

کیا وہ شخص جس کا بدعمل اس کے لئے آراستہ کیا گیا پھر اس نے اسے اچھا سمجھا (مومن صالح کے برابر ہوسکتا ہے ؟ ) اصل تو یہ ہے کہ اللہ جسے چاہے گمراہ (ف 1) کرے اور جسے چاہے ہدایت کرے سو کہیں ان پر پچھتا پچھتا کر تیری جان نہ جاتی رہے بیشک اللہ جانتا ہے جو وہ کرتے (ف 2) ہیں

شیطان کی حسین کمندیں 1: جس طرح دنیا کی سعادت کے لئے یہ ضروری ہے ۔ کہ دوستوں اور دشمنوں میں امتیاز کیا جائے ۔ اسی طرح فلاح اخروی کے لئے ناگزیر ہے ۔ کہ شیطان کو اپنا دشمن سمجھاجائے ۔ اور اس کے متعلق محکم یقین ہو ۔ کہ وہ دوستی اور خیر خواہی کا کبھی ارادہ نہیں کرے گا ۔ اس کی تمام چالیں محض اس لئے ہونگی ۔ کہ کسی طرح اس کا گروہ الگ پیدا ہوجائے ۔ اور ان سب کو وہ جہنم کا کندا بنا دے ۔ اور اسی رطح وہ مخلوق خدا سے انتقام لے کر اپنا کلیجہ ٹھنڈا کرے ۔ یہ یاد رہے کہ شیطان کبھی براہ راست حملہ نہیں کرتا ۔ کبھی جرات کے ساتھ گمراہی کی جانب دعوت نہیں دیتا ۔ اور کبھی کھلم کھلا مقابلے میں نہیں آتا ۔ بلکہ وہ نہایت حسین حسین کمندیں لے کر بڑھتا ہے ۔ چاندی اور سونے کی زنجریں پہناتا ہے ۔ اور خفیہ خفیہ دل کی چھاؤنی پر چھا جاتا ہے ۔ اس کے پاس انسان کو پھانسنے کے لئے ۔ بیشمار خوبصورت ذریعے ہیں ۔ وہ مال و دولت کی شکل میں نمودار ہوتا ہے ۔ وہ عزت وجاہ کا تاج لے کر آتا ہے ۔ وہ بیوی بچوں کی محبت بن کر پاؤں پکڑ لیتا ہے ۔ اور اس طرح نامحسوس طریق سے حق کی منزل سے دور پھینک دیتا ہے ۔ اس لئے سالک راہ محبت کے لئے ضروری ہے ۔ کہ وہ وقت نظرکا مالک ہو ۔ اور جانتا ہو کہ کن کن راہوں سے مخالف حملہ آور ہوگا ۔ اس کو خواہشات پر سخت نگرانی کرنا ہوگی ۔ اور دل کے خیالات پر پہرہ بٹھانا ہوگا ۔ 2: فرمایا کہ مرد مومن جو ایمان کی بہرہ مندی کے ساتھ دولت اعمال سے بھی مالا مال ہے ۔ اور وہ جو برائی کی ظاہری سج دھج کے متاثر ہوکر گناہوں میں گرفتار ہوگیا ۔ برابر نہیں ہیں ۔ یہ اللہ کا دین ہے جس کو چاہے ہدایت کی توفیق دے اور جس کو چاہے اس نعمت سے محروم رکھے ۔ اے پیغمبر ! آپ مخموم نہ ہوں ۔ اور ان کے گناہوں پر تکلف والم کو محسوس نہ کریں ۔ کیونکہ انہوں نے خود کوتاہی نظر کے باعث اس گمراہی کو پسند کیا ہے ۔ اور یہ چاہتے ہیں کہ کفر ہی کی حالت میں ہمیشہ رہیں ۔ معلوم ہوا ۔ کہ حضور ﷺ کو ان لوگوں کی گمراہی سے روحانی اذیت محسوس ہوتی تھی اور آپ یہ نہیں چاہتے تھے ، کہ ایک نفس بھی اللہ کی رحمت سے محروم رہے ۔ اور جہنم میں جائے ۔ آپ کی بعثت کا مقصد ہی یہ تھا کہ بنی نوع انسان کو گناہوں کی تاریکی سے نکال کر صداقت کی روشنی میں لے آئیں ۔ حل لغات :۔ حسرات ۔ حسرۃ کی جمع ہے ۔ بمعنے افسوس ۔ پشیمانی ۔

Top